Ka femra që kanë lindur të tilla: kanë një llogari bankare me 9 zero, çantë unike të punuar në mënyrë artizanale, bizhuteri me diamante… me pak fjalë shumë të pasura. Por nëse ne nuk bëjmë pjesë në këtë kategori (pavarësisht se ngulim këmbë të dimë përse jo), heqim dorë nga kjo pyetje. Ka ardhur koha të reagojmë!

Le t’ia nisim nga e para: domethënë le të pyesim veten se ç’lloj miliardereje mund të kishim qenë. Je gati për të bërë testin? Në këtë mënyrë, nuk harxhojmë kohën kot, por jemi gati ta presim kohën kur fati dhe lavdia do të na trokasë në derë.

1. Më në fund, pas dy vitesh përpjekjesh të kota, fitove lotarinë. Çmimi prej 30 milionë euro është i yti. Cilat janë gjërat që do të blesh në fillim?

a. Një vilë në Los Anxhelos, një instruktor personal aerobie, një çantë e firmosur, një varëse Cartier… objekte të tjera luksi. 3 pikë

b. I ble një shtëpi të bukur prindërve, paguan universitetin për motrën dhe shkon me pushime. 5 pikë

c. Lë një takim në bankë për të shfrytëzuar sa më mirë kapitalin tuaj. 1 pikë

2. Kur ke qenë e vogël, ke ëndërruar:

a. Të vraposh në male me Hajdin. 5 pikë

b. Të jetosh në Disneyland, në kështjellën e Bukuroshes së Fjetur. 1 pikë

c. Të bëhesh supervizore e fabrikës së çokollatës së Uilli Uonka-s, që të hash falas gjithë karamelet. 3 pikë

3. Meqë je shumë, por shumë e mirë (edhe pse e ke kuptuar që kjo gjë po të lë thatë nga xhepat), vendose që të bësh një bamirësi duke dhuruar disa mijëra euro. Kujt do t’ia dhuroje këtë shumë parash?

a. SHMDB-së, Shoqatës në Mbrojtje të Dinjitetit të Biondeve dhe Minorancave të tjera që diskriminohen. 3 pikë

b. PNNS, Programit në Ndihmë të Nënave Singëll, viktima të poshtërsisë së ish-bashkëshortëve. 5 pikë

c. FMMV-së, Fondit në Mbështetje të Miliarderëve në Vështirësi. 1 pikë

4. Sot në mbrëmje ke një takim romantik. Kush do të ketë fatin të darkojë me ty?

a. Daniel Mead, i serialit “E shëmtuara Betty”. Kryeredaktori i “Mode” do t’ju çojë në ditëlindjen e Marc Jacobs. 1 pikë

b. Doktori bukurosh i “Anatomia e Greit”. Ai të ka ftuar për të darkuar në një restorant romantik francez. 5 pikë

c. Christian Troy, i “Nip/Tuck”. Kirurgu më seksi i botës të propozon një festë me bazë botoksi dhe seks të shfrenuar. 3 pikë

5. Jepi tani, trego: pasioni që mban fshehur është:

a. Të ndjekësh Reality Show-n në televizor. Garat se kush humbet më shumë kilogram. 1 pikë

b. Të shohësh patinazh në akull. Pranoje që adhuron fundet e shkurtra, të qëndisura me fije të argjendta. 3 pikë

c. Fjalëkryqet. Dhe nuk është aspak e vërtetë që ato i bën edhe gjyshja jote. Por janë ushtrime që stërvitin trurin. 5 pikë

6. Ty të përmbyset bota kur:

a. Boshatiset llogaria bankare. 1 pikë

b. Mërzitesh gjatë një feste. 3 pikë

c. Shefi i madh refuzon një ide tënden, gjatë mbledhjes me stafin. 5 pikë

7. Pas tre vitesh pasionante, i dashuri yt duket gjithnjë e më i tërhequr dhe i pavendosur për të të kërkuar dorën. Çfarë bën?

a. Pret. Herët a vonë do të vendosë. 1 pikë

b. Ia kërkon ti e para: “Zemra, kur do martohemi ne të dy?”. 3 pikë

c. Vuan në heshtje dhe mendon të ndahesh. Sido që të jetë, ti nuk do t’i lutesh kurrë. 5 pikë

8. Shtëpia jote ideale është:

a. Një kështjellë e shekullit XVIII. 5 pikë

b. Një vilë gjigante në Malibu. 3 pikë

c. Një apartament në papafingo në një qytet si Nju Jorku-u apo Parisi. 1 pikë

9. Çfarë më shohin sytë? E pamundur! Brad Pitt është në radhë para dyqanit afër shtëpisë time. Mendon:

a. Zemra e vogël! Me siguri ka humbur rrugën. Me gjithë ato para që ka ai, duhet të ketë patjetër një kuzhinier francez që merret me pazaret dhe gatuan për të. 3 pikë

b. Ku e kam aparatin? Shpejt, shpejt, një foto. Kushedi sa mund ta shes në ebay. 5 pikë

c. Sushi, mjaltë, sallatë… tani po! E kuptoj si i ruan linjat Angelina Jolie. 1 pikë

10. Vajza në foto…

a. Përpiqet të shohë të dashurin. Ai i tha se mund të arrinte në mol që para një ore. 5 pikë

b. Është një top modele gjatë një shërbimi fotografik dhe ka veshur veshje që kushtojnë 3000 euro. 1 pikë

c. Është shumë e mërzitur që nuk mori me vete syzet e diellit që i rrinë aq bukur. 3 pikë

40-35 pikë

Profili yt: Miliarderja e denjë

Modeli yt është J.K. Rowling, autore e librave “Harry Potter”. Deri dje, një nënë singëll e papunë, e flakur nga shtëpia prej bashkëshortit. Sot është ajo që krijoi magjistarin më të famshëm në botë, që e shndërroi pastaj në shkrimtaren më të famshme dhe të pasur të botës. Meriton respekt!

Karakteristikat e suksesit: Punë dhe vetëm punë. Je e vendosur: nuk demoralizohesh kurrë, pavarësisht momenteve të vështira që kalon. Si në shtëpi edhe në zyrë, përfshihesh tërësisht në punë, sepse ke besim në projektet e tua. Dhe cila është qershia mbi tortë? Do të mbetesh e thjeshtë dhe e përmbajtur, edhe kur të kesh arritur majat e suksesit.

Pikat e dobëta: Je shumë serioze, nuk e lëshon kurrë veten për t’u argëtuar. Edhe atëherë kur ndodh, ndihesh sikur ke bërë faj.

Nuk je shumë e aftë në marrëdhëniet publike. Të pëlqen të bësh një jetë të tërhequr, të humbasësh në një fshat skocez. Ndoshta sepse i druhesh xhelozisë apo frikës se fati do të të braktisë.

E ardhmja: Ashtu si JKR dhe shtatë librat e saj “Harry Potter” (si dhe një roman krejtësisht ndryshe, që pritet të publikohet), përgatitu edhe ti të sigurosh të ardhmen. Pastaj, kur të sigurohesh që i ke krahët e ngrohta, argëtohu pak. Rrethohu nga persona më të çmendur, vanitozë dhe më kokëçarës se ty. Kështu, do të shijosh më mirë çfarë ke ndërtuar në jetë.

30-25 pikë

Profili yt: Trashëgimtarja

Modeli yt është Paris Hilton, trashëgimtarja e një perandorie të vërtetë, e hoteleve “Hilton”. Për të qenë më të saktë, një yll i vërtetë edhe në showbiz. Por bukuroshes iu hoq e drejta e trashëgimisë nga gjyshi i saj, pas shumë skandaleve të mbesës.

Karakteristikat e suksesit: Aftësia që ke për të joshur, pafytyrësia dhe njohjet e shumta. Je mbretëresha e marrëdhënieve publike, i njeh të gjithë dhe mund të shkosh ku të dëshirosh. Miqtë e tu vlerësojnë entuziazmin, energjinë, pasionin për të mos humbur as edhe një festë, si dhe dëshirën e madhe që ke për të jetuar. Shijon jetën çast pas çasti dhe nuk shqetësohesh kurrë për asgjë, por mendon se herët a vonë problemet zgjidhen vetë.

Pikat e dobëta: Je shumë dembele dhe i nënshtrohesh në mënyrë pasive fatit tënd. Nuk tregon vëmendjen e duhur ndaj të tjerëve, lodhesh shpejt dhe në vend që të impenjohesh seriozisht mbi një projekt, humbet kot kohën duke u marrë me detaje të kota.

E ardhmja: Ashtu si Parisi, edhe ti je në pritje për të përfunduar një projekt tëndin (krijimin e një parfumi apo një linje të brendshmesh seksi). Por ndryshe nga Parisi, ti vë në praktikë idetë e tua për të konkretizuar diçka. Edhe pse nuk ke shumë ambicie, ruajtja e vendit të punës, si dhe e një raporti të qëndrueshëm me një mashkull, që zgjat më shumë se tre javë, është gjithmonë një hap para.

20-10 pikë

Profili yt: Femra në karrierë

Modeli yt është Madonna, këngëtarja më e paguar në botë. Turne në të gjithë botën, mijëra CD të shitura, kontrata publicitare. Ylli i popit ka një pasuri që vlerësohet me një shifër prej 400 milionë dollarësh.

Karakteristikat e suksesit tënd: një intuitë që të lejon të bësh zgjedhjet e duhura në momentin e duhur. Di të kapësh mundësitë atëherë kur të vijnë. Guximi dhe ambicia për të ecur mes rrezikut të bën një femër të fortë, si dhe një negociatore të shkëlqyer.

Pikat e dobëta: Jo gjithmonë gjen kohën për t’u çlodhur. Prandaj, në dashuri apo në raportet miqësore, konsiderohesh si një person stresues. Me ty njerëzit mund të lodhen shumë shpejt.

E ardhmja: Mendo pak më shumë për të tjerët. Madonna herë pas here organizon koncerte bamirësie, siç ishte ai i kohëve të fundit për UNICEF-in.

Por, ti mund të mjaftohesh edhe thjesht duke shoqëruar nipin në këndin e lojërave apo në një shfaqje me kukulla. Kështu, jo vetëm do t’ua bësh qejfin fëmijëve, por edhe familjarët e tu do të mendojnë se të kanë paragjykuar më kot.

Lista e gjatë e shpenzimeve mund ta bëjë ditën tënde të
dasmës të duket e frikshme dhe thuajse e papërballueshme për xhepat. Por ja që
mund t’ia dalësh të organizosh një festë të bukur dhe të mos rrënohesh
financiarisht. Ne po të japim disa këshilla

Të planifikosh dasmën mund të jetë skajshmërisht stresuese,
sepse duhen vënë shumë gjëra në vend dhe e gjithë kjo është shumë e kushtueshme.
Por një dasmë nuk ka pse të jetë shumë e shtrenjtë për të qenë një përvojë e
mrekullueshme. Ti mund të bësh dasmën e ëndrrave edhe me një pjesë të kostos që
dëgjon të përmendet. Ka shumë mënyra për ta bërë dasmën më pak stresuese e më
pak të rëndë për financat tuaja, kështu ti dhe bashkëshorti i ardhshëm do mund
të keni ca para më shumë për t’i shpenzuar për gjëra që do t’ju duhen për të
nisur jetën në çift.

Sigurisht që në fund të llogarive do ta kuptosh se më lirë se
gjithçka të bie të arratisesh me bashkëshortin e ardhshëm… Gjithsesi, këtu
mund të gjeni disa sugjerime se si të shkurtoni shpenzimet dhe të keni një dasmë
të bukur.

Të përgjithshme:

Paracakto buxhetin: Hapi i parë për t’i
mbajtur shpenzimet e dasmës nën kontroll është të krijosh një buxhet. Vendos sa
do të shpenzosh dhe mos e kapërce, të paktën jo për detaje shtesë. Ca para këtu
e ca atje mund ta ngrenë goxha shifrën e shpenzimeve.

Shpenzime parësore: Ka disa gjëra që janë më
të rëndësishme se sa të tjerat për ty dhe dhëndrin e ardhshëm. Jepu përparësi
pikërisht këtyre gjërave që kanë vlerë vërtet për ju dhe shkurto kostot e atyre
që nuk janë aq të rëndësishme.

Thjeshtëzo: Një rrugë për të kursyer para,
por edhe për të zvogëluar stresin, është ta thjeshtëzosh dasmën. Ndonjëherë, pak
është shumë. Vërtet ke nevojë për secilën nga pesë pjatat e darkës për të gëzuar
ditën tënde të veçantë?

Jepi kohë vetes: Duke i dhënë kohë të
mjaftueshme vetes për të bërë plane, nuk do ndihesh e stresuar në përgatitjet e
minutës së fundit, që të detyrojnë të zgjedhësh shërbime dhe produkte më të
shtrenjta. Duke pasur më shumë kohë, ti do të kesh mundësi të bësh blerje me
leverdi dhe jo të zgjedhësh atë që është e gatshme në minutën e fundit. Përveç
kësaj, po të kesh një kartë krediti që grumbullon pikë, do kesh kohë ta
përdorësh, kështu që mund të përfitosh nga këto “shpërblime” për blerjet e
mëvonshme.

Veshjet dhe aksesorët

Merr me qira fustanin: Për ato që nuk janë
të fiksuara në idenë që ta kenë fustanin edhe për brezat e ardhshëm, marrja me
qira është një mundësi e mirë (dhe në fakt shumica e nuseve e kanë kuptuar
këtë).

Kërko ulje për qiranë e produkteve të marra në
grup: Kërko një butik që bën ulje kur aty merren shumë kostume me qira.
Mund të arrijë deri në atë pikë sa me qiratë e smokingëve për shoqëruesit e
dhëndrit, smokingu i këtij të fundit të merret falas në ditën e dasmës.

Bliji këpucët me ulje çmimi: Po t’i shtosh
fjalën “dasmë” çdo gjëje, çmimi rritet në progresion. Këpucët nuk bëjnë
përjashtim. Përpiqu t’i blesh këpucët në një dyqan me ulje çmimi (këpucë që
ngjanë si këpucë nusesh shpesh mbeten në dyqan, sepse është e vështirë të blihen
për jetën e përditshme).

Merr hua nga mikeshat dhe të afërmet: Bëje
më të veçantë tërë dasmën tënde duke marrë hua aksesorët nga familja dhe miqtë.
Të vësh stoli të çmuara të familjes apo një vello të trashëguar do t’i jepte
pamjes suaj, por edhe kujtimeve, një notë personale dhe me kuptim.

Lulet

Përdor lulet e stinës: Lulet e stinës janë
shumë më të lira se ato që janë më ekzotike. Kështu, do kursesh shumë dhe
dekoret dhe buqetat do duken po aq bukur.

Ripërdorimi: Ti mund të kursesh para po të përdorësh të
njëjtat lule për të zbukuruar kishën në ceremoninë e dasmës (nëse do ta bëni një
të tillë në kishë) dhe ambientin ku do organizoni festën apo darkën. Pyet nëse
njeriu që do merret me lulet apo një mik mund t’i transportojë. Do ketë rrezik
mos dëmtohen gjatë rrugës, por gjithsesi do t’ju kursejë shumë.

Ceremonia

Bëj një festë më të vogël: Festa e dasmës,
nëse bëhet më e vogël, ul shumë nga totali i shpenzimeve, sepse do keni nevojë
për më pak lule zbukurimi, për më pak ushqim dhe pije, për një ambient më të
vogël etj.

Shmang sezonin e pikut të dasmave: Sezoni i
pikut të dasmave është maj-shtator. Një dasmë jashtë këtij sezoni do t’ju
kursente shumë në prenotime.

Mendo si mundësi alternativa të tjera transporti: Në rast se
nuk është dhe aq e rëndësishme për ty që të hipësh e veshur me fustanin e nuses
në një limuzinë apo në pajton, mund të shfrytëzosh një formë tjetër për të
kursyer. Bëhu krijuese. Merr me qira një makinë antike nga një mik ose i afërm
dhe dekoroje për dasmë. Këtij i thonë stil dhe zgjuarsi.

Shkurto listën e të ftuarve: Ki parasysh që
çdo i ftuar që i shtohet listës rrit shpenzimet. Kjo tingëllon si zhurma e dorës
që shtrëngohet, por ndoshta as ti vetë nuk do të ftosh njerëz që nuk i njeh. Fto
vetëm ata me të cilët je shumë e afërt.

Tregohu kreative për vendin: Do ishte shumë
me leverdi po të largoheshe nga ato vendet tipike për dasma. Po të jetë e
mundur, kopshti i një të afërmi apo një vend i hapur i gjelbëruar do ishte ideal
për një ceremoni dasme. Kjo jo vetëm që do kursente ca para, por do ta kthente
në një festë të veçantë dasmën tuaj.

Dekorimet

Jo tradicionale. Nuk është e thënë të lësh
shuma të mëdha parash për dekorimin e tavolinave. Lulet, që janë më të
zakonshmet, kushtojnë shumë. Një gotë qelqi ku noton një qiri do ishte perfekte
për t’u vendosur në qendër të tavolinave. Me këtë mund të merret dhe një njeri i
afërm. Produktet e tjera të zbukurimit mjafton të kombinohen mirë dhe do t’i
jepnin tavolinës një pamje feste, edhe pse mund të mos jenë shumë të
shtrenjta.

Bëji vetë dhuratat për të ftuarit. Edhe ato
mund t’i bëni vetë, duke sajuar lule, kartolina, copa tyli, fjongo, por që
marrin një pamje interesante po të jenë të kombinuara bukur.

Fotografitë

Tregohu e kujdesshme: Në fakt për këtë nuk
është e nevojshme të këshillosh, por gjithsesi po të kujtojmë: mos merr
fotografin e parë që gjen në numërator apo që të propozojnë. Mundësitë janë,
kështu që kërko alternativën më të mirë.

Të rinjtë e talentuar ose të afërmit: Në
rast se nuk mund të përballosh një fotograf profesionist, të rinjtë e talentuar
në këtë fushë, sidomos ata që e kanë ndjekur një kurs në këtë profil, janë një
mundësi e mirë për të marrë rolin e fotografit. Për të qenë të sigurt, mund t’i
kërkoni t’ju tregojnë disa nga fotot që kanë shkrepur më parë. Edhe një i afërm
i aftë në këtë fushë mund t’ju vijë në ndihmë ose të paktën për fotot gjatë
përgatitjeve dhe ato me miqtë e familjen.

Stampoji vetë fotografitë: Në rast se
fotografi do t’ju jepte në dorë dhe fotografitë e stampuara, atëherë ju do të
shpenzonit shumë më tepër. Më mirë merrini në CD dhe stamponi ato që ju duhen.
 

Ftesat

Bëji vetë: Në rast se je e zonja, mund t’i
përgatisësh shumë lehtë. Ti mund të përdorësh programet e kompjuterit tënd dhe
letër të blerë në kancelaritë që e tregtojnë. Nuk kërkon aspak mund, të jep
shansin për ta bërë ftesën sipas fantazisë tënde dhe të kursen.

Shkruaju të ftuarve të përgjigjen online ose në
telefon: Krahas ftesës, ti mund t’u dërgosh një adresë email-i ose një
numër telefoni, që ata të konfirmojnë praninë e tyre.

Muzika

Përgatite vetë diskun e preferuar të
këngëve: Në vend që të ketë në çdo hap të ceremonisë një grup
muzikantësh, fare mirë ti mund të lësh në sfond muzikën tënde të preferuar. Në
kishë, në koktejin e dasmës apo në mes të interpretimeve live mund të dëgjohen
këngët e tua të preferuara, që kanë një kuptim të veçantë për ty dhe
bashkëshortin e ardhshëm.

Merr një orkestër amatorësh: Në rast se nuk
mund të marrësh dot një orkestër dhe këngëtarë profesionistë, gjej disa studentë
ose muzikantë të rinj amatorë. Ndoshta nuk do njohin këngët më të famshme të
dasmave, por do i realizojnë ato thuajse njëlloj si të tjerët.

Bëhu DJ i dasmës tënde: Është më e lehtë se
kurrë të jesh DJ i festave. Ti mund të bësh miksimet e tua në një CD. Është një
rrugë e thjeshtë për të qenë e sigurt se gjatë festës do ketë vetëm muzikë që të
pëlqen.

Ushqimi

Syno për bufe: Ndonjëherë bufetë mund të
jenë më pak të kushtueshme se sa darkat apo drekat ku njerëzit ulen në tavolina.
Konsultohu me një person që merret me këtë nëse mund të jetë një alternativë më
e mirë. Bufetë janë më të thjeshta edhe për të kënaqur të ftuarit që e shijojnë
ushqimin se sa të shtrosh një darkë me shumë mundësi zgjedhjeje.

Kufizo barin e hapur: Ta kufizosh barin e
hapur tradicional në më pak kohë ose në më pak mundësi zgjedhjeje i shkurton me
të vërtetë shpenzimet.

Bëj një tortë më të vogël: Tortat e dasmës
janë të të gjitha formave dhe përmasave, por sa më luksoze pamja e jashtme, aq
më e kushtueshme është torta. Tortat me një kat janë shumë më të lira se ato të
lartat. Në rast se ti do një tortë me kate për të bërë foto duke e prerë, merr
një të vogël dhe ndërkohë përdor një tjetër në formë të thjeshtë për t’ua
servirur të ftuarve. Ajo shijon njëlloj, dhe pse nuk duket njëlloj, kështu që
vendos nëse është e domosdoshme të shpenzosh aq shumë.

Bli me shumicë: Ushqimet dhe pijet janë më
të lira kur blihen me shumicë. Kështu që përpiqu të blesh gjërat kryesore
kështu. Vera dhe shampanja mund të sjellë një ulje të dukshme shpenzimesh po të
mos blihet në shishe.

Mamaja e tij po vë në rrezik martesën? Specialistët tregojnë rregullat e mbijetesës. Dhe japin shpresë. Sepse “ajo” mund të bëhet një aleate

Ka nga ato që kontrollojnë mbeturinat për të parë se mos ke hedhur perimet që sapo kanë nisur të zbuten, por ka edhe nga ato hipokondriket, që të gjenden në shtëpi në mes të natës, të bindura se po pësojnë një infarkt. Disa tregohen të gatshme për të mbajtur fëmijët, por kur ti ke vërtet nevojë, kanë disa punë urgjente për të zgjidhur; të tjerat fëmijët i mbajnë, por pastaj pretendojnë edhe të ndërhyjnë në çdo çështje të edukimit të tyre, sepse “në kohën e tyre gjërat ishin ndryshe”.

Klisheja është gjithmonë e njëjta: 1) gruaja e nxehur me mamanë e bashkëshortit; 2) burri që nuk i thotë asgjë mamasë; 3) gruaja e nxehur me bashkëshortin.

Dhe konflikti i vjetër ecën me kohën. Grupe nusesh “desperates” nuk ngurrojnë të shkruajnë disa deklarata dashurie edhe nëpër faqe interneti të llojit: “gjermanët i thonë vjehrrës “schwiegermutter”, një fjalë që të kujton “schwiegermonster”, pra shkurt “ankth”’.

Sekretet për të bashkëjetuar në harmoni

Po përse marrëdhënia me mamanë e tij është shpesh konfliktuale? Dhe cili është sekreti për një bashkëjetesë të qetë? Janë pyetur për këtë seksologë dhe psikoterapeutë në mbarë botën. “Kemi pasur në terapi vjehrra që e kishin shumë të vështirë të vazhdonin lidhjen me djemtë e tyre pas martesës së këtyre të fundit, për shkak se nuset nuk donin të shkonin për t’i takuar, i ndalonin të kujdeseshin për nipërit dhe refuzonin çdo lloj ndihme për pazarin apo pastrimin e shtëpisë. Ndonjëherë ato janë gra të thjeshta, që duan vetëm të ndihmojnë; në raste të tjera, është e kundërta: bëhet fjalë për gra “të forta”, që duan të vendosin rregullat. Vjehrrat më të vështira janë mamatë e djemve, sepse vajzat i pranojnë në jetën e tyre më me lehtësi mamatë e veta, duke përjashtuar ato të partnerëve”.

Në rast se nusja nuk grindet me vjehrrën hapur, delegon bashkëshortin si zëdhënës. Pastaj zihet me të. Kontradiktat lindin nga frika e nënave që i biri do martohet, përveçse me gruan, dhe me vlerat, mënyrat e të menduarit dhe sjelljet e familjes së saj. Shembull: ai mund të admirojë hapur mamanë e asaj që punon dhe, ndoshta, pa dashur, ta bëjë mamanë e tij të ndihet një shtëpiake të pavlerë. “Dhe ndërmjet vjehrrit dhe dhëndrit mund të lindin fërkime, sidomos kur është një baba xheloz për të bijën ose më i pasur dhe i pushtetshëm se i shoqi”, sqarojnë specialistët. “Por, në përgjithësi, dëshira për të pasur marrëdhënie familjare të ngushta i përket pak botës mashkullore”.

Lojë rolesh

Kur të mos marrit vesh vë në rrezik martesën? Përgjigjen psikoterapeutët: “Kur partneri nuk shfaq kurrë solidaritet me të shoqen kur kjo kritikohet dhe i beson vetëm të ëmës për zgjedhjet e rëndësishme. Kur palët jetojnë shumë afër dhe vjehrra nuk i bie ziles, por përdor çelësat për të hyrë në shtëpi. Kur ajo “i fryn zjarrit” në çastin kur ka grindje, mbështet të birin në rast se ka tradhtuar të shoqen dhe e mbron duke mbuluar gënjeshtrat e tij”. Jo gjithmonë, ama, mënyra më e mirë për të mbrojtur hapësirën tënde është agresioni. Më mirë të tregohesh diplomate: për shembull, mund t’i thuhet vjehrrës të lajmërojë para se të kalojë për t’ju takuar, që të organizoheni për t’i kushtuar më shumë kohë.

Me gjithë të tëra këto, mamaja e tij mund të bëhet një mikeshë; është e mundur edhe që të ndërrojë një aleancë me nusen, pa dijeninë e të birit: “Nuk keni pse të keni frikë, sepse ju jeni gruaja dhe ajo është mamaja; mund të jetë një grua që ndërhyn, por edhe e gatshme për të ndihmuar. Vjehrra mund të ketë dëshirë t’ju dojë edhe ju”, përfundojnë specialistët. Ndoshta nuk është më aq e vërtetë ajo që mund të thonë disa gjyshe tërë temperament: “Vjehrrat janë të mira në shtëpi vetëm në pikturë”. Me siguri flisnin për vete: ishin mamatë e baballarëve tanë (jo shumë larg këtyre të sotmëve në fakt) dhe vjehrrat e mamave tona të mira.

Pesë rregulla të arta për një paqe të hekurt

1. Prezantohu me sinqeritet, shfaq një sjellje miqësore dhe përpiqu të kuptosh çfarë roli ka vjehrra jote në familje.

2. Mos ji skajshmërisht xheloze; shfaq edukatë, respekt dhe, nëse është e mundur, konfidencë. Mund të kritikosh familjen e origjinës vetëm nëse je anëtare e saj, por është shumë e vështirë të japësh gjykime të tilla po të jesh në rolin e nusesh.

3. Nëse vjehrra jote është e nervozuar, kërko armëpushim.

4. Bëj një marrëveshje me partnerin dhe pastaj lejoji të tijtë të kujdesen për fëmijët dhe për shtëpinë.

5. Kujtohuni që edhe ju do bëheni vjehërr ose mund të jesh tashmë! Në rast se partneri yt ka shumë përgjegjësi familjare, përpiqu ta mbështesësh dhe mos u bëj problemi i tij i tretë.

Somario

“Shqetësohuni në rast se ju hyn në shtëpi pa ju thënë. Dhe më shumë akoma, në rast se fsheh gënjeshtrat e të birit”

Dicitura

Skena nga filmi “Monster-in-law”, ku Charlie (Jennifer Lopez) duhet të përballet me të papërballueshmen Viola Fields (Jane Fonda), mamanë e bashkëshortit të saj të ardhshëm

Nuk është as sportive si e kaltra, as e ëmbël si roza. As chic si e zeza, as e pafajshme si e bardha. Është gri. Një e ndërmjetme që zonjat e politikës e zgjedhin me shumë dëshirë në të gjitha rastet kur nuk duan të jenë as shumë sportive, as shumë të ëmbla, as shumë chic, as shumë të pafajshme… por thjesht elegante

Jozefina bëhet e ëmbël

Ndodh kaq rrallë ta shohësh jashtë xhaketave serioze zonjën e Parlamentit, Jozefina Topalli. Aq më rrallë ndodh ta shohësh me fustane të tillë: pa mëngë, të derdhur, me prerje klasike. Ja që kur gjendet jashtë sallës së parlamentit e kur zhvishet nga hija e rëndë e kryetares, Jozefina mund të duket edhe kështu: e ëmbël. Kësaj radhe “fajtori” është fustani gri me pika, stiluar nga Mirela Nurçe.

Lajla pa lajle-lule

Një kostum me shkëlqim, me dizajn imitim lëkure pitoni dhe këpucë të po së njëjtës ngjyrë. Vetëm çanta ngjyrë bezhë del jashtë kornizës së ngjyrës gri. Por deputetja Lajla Përnaska shquhet për natyrën e saj fashioniste. Ndaj e di mirë se look-u “total grey” nuk këshillohet nga ekspertët e modës. Nëse kostumin e ka të detyruar, me detajet mund të luajë sa të dojë.

E vrenjtura Arta

Me siguri që nuk e ka fajin kostumi gri me kuadrate që e ka vrenjtur në fytyrë deputeten socialiste Arta Dade. Sidomos kur bëhet fjalë për ngjyrën që ajo preferon më shpesh për veshjet e saj zyrtare. E megjithatë, nëse kostumi do ishte rozë, për shembull, Arta me siguri që nuk do dukej kaq e zymtë.

Ca doza sportive për Valentinën

Larg kostumeve, fundit dhe xhaketës së kopsitur. Me një hije më sportive dhe të lirshme, Valentina Leskaj kapërcen derën e selisë rozë për të dalë në një konferencë për shtyp, e sigurt se ajo që do duket në ekranet e TV-ve do jetë vetëm xhaketa serioze gri. Por ja që fotografitë larg foltores nuk mund t’i shmangë dhe ja ku e keni look-un e saj të plotë.

Me pak gri dhe je OK…

…do ishte një formë këshille nga ministrja e Integrimit Majlinda Bregu. Nëse do ishte vetëm për fustani e zi që ndjek linjat e turpit dhe këpucët e zeza, Majlinda do dukej sikur ishte nisur për një koktej. Por ajo e ka gjetur zgjidhjen: një xhaketë gri dhe pamja është në rregull. Madje jo thjesht gri. Ka edhe ca detaje të verdha, që e bëjnë akoma më të veçantë.

Kur pozon Monika

Natyra e saj çapkëne nuk të dhuron shpesh poza të tilla. Ndaj vështirë se do ta kishim kapur rastësisht me këmishën e saj gri. Por ja që Monika Kryemadhi mund të pranojë të pozojë me shumë dëshirë kur bëhet fjalë për një set fotografik. Pasi i ka dhënë më parë fytyrës dritë, në mënyrë që grija e këmishës të mos e tregojë më të zbehtë se ç’duhet.

Nuk po flasim për rrathët e parajsës. Por për ata që mbahen në vesh. Që mundesh t’u besosh… përjetësisht

Vathë që mbërthehen nga një buton apo nga ata që varen sigurisht që kemi shumë, por ja që veshët tanë duket se presin që të zbukurohen me rrathë! Janë sa interesantë, aq edhe trendy dhe shumë të lashtë…

Tradicionalisht janë mbajtur nga skllavet, por në shekullin XVIII vathët rrathë dolën në modë, kur filloi t’i mbajë Maria Antoneta.

Në vitet ‘70 ishin një nga aksesorët e pazëvendësueshëm të stilit hippie. Të mëdhenj e të lehtë, kombinoheshin mrekullisht me fustanet e gjatë, që i lëvizte era…

Nuk njihet origjina e saktë e vathëve rrathë. Janë gjetur në Ur, në Mesopotami, në varret që arrijnë të dëshmojnë për një periudhë deri në vitin 2500 p. K.

Bëhej fjalë për vath-stoli, ku gdhendeshin forma gjarpërinjsh apo hëne: sipas besëtytnive, shërbenin për të mbrojtur veshët, që konsideroheshin qendra e inteligjencës dhe u lejonin shpirtrave hyjnorë të hynin në trupin e njeriut.

Ndërsa sot konsiderohen një nga shpikjet më rezistente në jetën e një femre, sepse vathët rrathë, dhe pse jo me formën më elegante ndër gjithë të tjerat, janë një aksesor që mund të shoqërojë çdo lloj stili: nga ai i vajzave të veshura me xhaketa lëkure, deri te zhveshja e supeve nga fustanet elegantë bust. Dhe ashtu si i kemi parë të përhapur në vitet ‘90, ashtu edhe sot nuk çuditemi tek ia shohim një personazhi të njohur. Të përshtatshme sipas llojit për jetën e përditshme, por edhe për skenë, të kombinueshme me flokë të mbledhur fort topuz apo të derdhur mbi supe, vathët rrathë duket se rrethojnë idenë gjeniale, përgjigjen e saktë për të bërë përherë tendencë.

1. Trinity… Unaza me 3 lloje ari e Cartier vjen në version vathësh rrathë me diamante

2. Si një lavjerrës, kuarci lëkundet dhe thyen dritën…

3. Të frymëzuar nga stolitë tibetiane, rrathët e Diane von Furstenberg japin një look hippie chic

4. Të thjeshtë rrathët Dinh Van, 100 % ar i verdhë

5. Rrathët “Attrape-moi si tu m’aime” nga Chaumet. Si t’u rezistosh këtyre rrathëve diamantesh, të punuar në formë merimange?

6. Perlat e kuqe lëkunden në çdo lëvizje të kokës…

7. Bulgari u ka varur rrathëve shenjat dalluese të linjës së vet

8. Kontornoja prej diamantesh nënvizon pastërtinë e rrathëve Adamence

9. Mbaje vath në vesh: rrathët brendashkruhen një figure kënddrejtë

10. Lakuriqët e natës prej diamanti kanë ngecur në rrathët e Lydia Courteille. Ja si mund të shndërrohesh në një catwoman…

11. Rrathët “Camélia Ajouré” prej ari të verdhë 18-karatësh nga Chanel Joaillerie

Kujdes kur të hiqni nga dollapi rrobat e verës dhe të nxirrni të trashat e vjeshtës. Disa edhe mund t’i lini, që te këmishët transparente e deri tek fustanet prej mëndafshi. Mund të vishen edhe tani. Ja se si…

Këmishë transparente me lule

Në verë: ishte mbulesa e vetme e trupit për të pirë një aperitiv mbi një barkë.

Në vjeshtë: Miss Sixty na kthen në vitet ‘70: këmisha futet tek xhinset me bel të ulët dhe mbulohet deri diku me një triko të punuar rrallë. Një kapelë në kokë e plotëson look-un vjeshtor.

Fustan stil tullumbace me prerje perandorake, pa mëngë

Në verë: ka qenë guri me fat për të nxjerrë në pak dekoltenë dhe shpatullat e bronzta nga plazhi.

Në vjeshtë: Blugirl Blumarine luan me të kundërtat dhe e ngroh fustanin stil dolce vita me një palë doreza leshi, me geta dhe një bluzë të trashë me golf.

Këmishë e lehtë me fantazi lulesh

Në verë: ka bërë figurën e saj të bukur në qytet, me tisin e lehtë dhe të shkujdesur, perfekte edhe për të shkuar në zyrë.

Në vjeshtë: Diane von Furstenberg e lë të dalë nga një xhaketë trekuart super të qëndisur me hapje të madhe dhe një rrip të hollë në bel.

Pantallona të shkurtra me temina të zeza

Në verë: kemi kërcyer me to në diskotekë me një bluzë të hollë ose bust të ngjitur pas turpit.

Në vjeshtë: Enrico Coveri vazhdon të ndezë dëshirën për të kërcyer me një stil punk-fetish, kombinuar me bluzën dhe këmishën shumëngjyrëshe, që bën kontrast me dorezat.

Bluzë mëndafshi gri-perlë

Në verë: ka zgjidhur jo pak probleme edhe në qytet, kombinuar me një fund të hollë ose një palë pantallona me prerje mashkullore.

Në vjeshtë: Emanuel Ungaro e mbulon me një xhaketë rozë të butë që lihet e hapur, për të vënë theksin tek dekolteja, që nxirret në pah nga një palë reçipeta në formë ballkoni.

Fustan-këmishë prej sateni, me fruda mbi dekolte

Në verë: pati momentin e vet të lavdisë alla Amy Winehouse për sexy-party në plazh.

Në vjeshtë: Frankie Morello-n e sheh akoma të veshur edhe në stinën e ftohtë me një peliçe me viza horizontale, me stil paksa retro.

Mini kaftan etnik me mëngë të fryra

Në verë: veshur me xhinse, i dha look-ut një prekje alla vitet ‘70.

Në vjeshtë: Just Cavalli e interpreton me geta të leoparduara dhe një kapelë të gjerë prej shajaku të zi, që do të theksojnë ana tënde chic, duke e braktisur thuajse tërësisht çdo referim folk.

Maksi-këmishë e stampuar

Në verë: ka qenë protagoniste e festave të detit, duke na dhuruar një pamje prej dive.

Në vjeshtë: mund të vishet edhe në pasditen e vonë, me kusht që të çmitizohet, siç bën Laura Biagiotti, me një triko të butë e të bollshme, pa jakë dhe me xhepa.

Rikthehet fuqishëm edhe këtë vit. Me një të veçantë. Pasi ka pushtuar frymëzimin e stilistëve nëpër skica veshjesh, tani bëhet tendencë edhe e trukut të mbrëmjes. Sepse ngjyrës lejla nuk i thua dot jo..

E kemi parë mbi pasarela: lejlaja është përfundimisht një nga ngjyrat e forta të stinës. Është bërë protagoniste edhe e trukut të syve. Jo më e sfumuar në tone, si në vitet e shkuara.

Si?

Tani ngjyra lelja përdoret në të gjithë qepallën, bashkë me penelin, për të ngopur ngjyrën, dhe krijon një efekt smokey. U shkon të gjitha atyre që kanë sy të kaltër ose të gjelbër. Kombinohet me rimel të zi.

Detaje

Pasi të kesh vendosur mbi qerpikë rimelin e zi, kalo vetëm tek majat e sipërme një furçë rimeli ngjyrë lejla.

Efekt surprizues

Vështrimi bëhet magjik, misterioz.

Po mbi buzë?

Ke vetëm dy alternativa: një buzëkuq kafe në neutral ose një shkëlqyes në nuancë lulevilesh, për një total look të përshtatshëm për në mbrëmje.

Ka mbaruar stina e ngjyrave. Bashkë me ditët gri, vjeshta sjell edhe veshjet me tone të zbehta.

Por që nuk të jep hije aspak të tillë nëse zgjedh modelin e duhur dhe e kombinon me aksesorët e duhur. Është serioze, elegante, chic. Është grija ngjyra dominuese e ditëve gri.